Ամենազոր սխտորը

Հնագույն ժամանակներից մարդկությանը հայտնի են սխտորի բուժիչ հատկությունները: Սխտորով փորձել են բուժել հայտնի բոլոր հիվանդությունները և այն համարել դրանց դեմ պայքարի արդյունավետ միջոց:

Քիմիական հարուստ բաղադրության շնորհիվ սխտորն օժտված է բուժական մեծ հատկություններով: Հայտնի է, որ այն նպաստում է արյան շրջանառության, արյունատար անոթների վիճակի, շնչուղիների աշխատանքի բարելավմանը, օրգանիզմից շլակների հեռացմանը, տոնուսի և աշխատունակության բարձրացմանը: Այն խթանում է ստամոքսաաղիքային տրակտի, մարսողական համակարգի աշխատանքը, օգտակար է դիսբակտերիոզի, քրոնիկական հոգնածության, սթրեսի դեպքում, ունի մանրէասպան հատկություն:

Ժամանակակից բժշկագիտությունը ևս ընդունում է, որ սխտորն օժտված է բուժական մի շարք հատկություններով, որի շնորհիվ այն այսօր շատ դեղամիջոցների բաղադրամասն է կազմում: Բժշկագիտական առաջատար կենտրոններում սխտորից բազմաթիվ հիվանդությունների դեմ պայքարի նոր դեղամիջոցների ստեղծման և նրա բուժական նորանոր հատկությունների հայտնաբերման ուղղությամբ տարվող հետազոտական աշխատանքները չեն դադարում:

Գիտնականները հետազոտել են առնետների երկու խումբ: Առաջին խմբին կերակրել են թարմ կտրած, երկրորդին` չորացրած սխտորով, այնուհետև արհեստականորեն առաջացրել սրտի նոպա ու շարունակել ուսումնասիրությունները: Առաջին խմբի առնետների սրտամկանն ավելի շուտ է ապաքինվել, քան երկրորդներինը:

Այն, որ սխտորն իր բաղադրության մեջ մտնող ալիցինի շնորհիվ խթանում է սրտի աշխատանքը, բարելավում անոթների վիճակը, նվազեցնում սիրտ-անոթային հիվանդությունների առաջացման ռիսկը, արյան մեջ խոլեստերինի քանակությունը, ԱՄՆ-ի Կոնեկտիկուտի համալսարանի սիրտ-անոթային հիվանդությունների հետազոտական կենտրոնի գիտաշխատողներին վաղուց էր հայտնի: Նրանց վերջին հետազոտությունների տվյալների համաձայն պարզվել է, որ կարևորը ոչ թէ ալիցինն է, այլ նրա բաղադրամասը կազմող ծծմբաջրածինը` ցնդող միացություն, որը գոյանում է սխտորը կտրելու պահին և կարճատև պահպանվում նրա հյութի մեջ: Այդ գազին բնորոշ է նեխած ձվի կամ կենցաղային նեխող թափոնների տհաճ հոտը: Եվ քանի որ դա գազ է, ապա սխտորն օգտակար է միայն թարմ, հենց նոր կտրած կամ ճզմած վիճակում, ուրեմն դրա ՀՈՏՆ ՈՒՆԻ ԲՈՒԺԻՉ ՀԱՏԿՈՒԹՅՈՒՆ: Պարզվում է, որ այն օժտված է սրտամկանը վերականգնող, արյունատար անոթների պատերի հարթ մկանների լարվածությունը թուլացնող հատկությամբ, դրանով իսկ վերացնելով սպազմը և կանխելով հնարավոր հետևանքերը` ինֆարկտն ու ինսուլտը:

Սիրտ-անոթային համակարգի բարդացած և քրոնիկական հիվանդությունների դեպքում ամենօրյա սննդակարգում պետք է հաճախ սխտոր օգտագործել: Ավելին, թարմ սխտորի կամ սխտոր պարունակող դեղամիջոցների, պատրաստուկների հետևողական օգտագործման դեպքում խոլեստերինի քանակը կարող է նվազել 12-16%-ով:

Սխտորը  պարունակում է ոչ միայն բջջանյութ, սպիտակուցներ, ճարպեր, կարբոհիդրատ, ասկորբինաթթու, բազմաթիվ միկրոտարրեր` նատրիում, կալիում, կալցիում, մանգան, երկաթ, ֆոսֆոր, մագնեզիում, յոդ, ցինկ, C, B, D, P խմբի վիտամիններ, այլև եթերայուղեր, ծծմբի միացություններ` սուլֆիդներ, ֆիտոնցիդներ և այլն:

Սխտորը նաև կանխարգելման հրաշալի միջոց է: Գրիպի համաճարակների դեպքում այն պետք է ավելի հաճախակի օգտագործել: Սխտորում պարունակվող ծծմբի միացությունները, ֆիտոնցիդները օժտված են ախտահանիչ հատկությամբ, որոնց ազդեցության շնորհիվ վիրուսները, վնասակար և հիվանդածին մանրէները շատ արագ ոչնչանում են: Կրկին հիշեցնենք, որ դրանք ցնդող նյութեր են, ուստի սխտորը պետք է օգտագործել մաքրելուց անմիջապես հետո:

• Երկու ճաշի գդալ սխտորի հյութով բաժակը դրեք տաք ջրով լցված թասիկի մեջ, ամուր թղթից պատրաստած ձագարով բաժակը ծածկեք, այնպես, որ ձագարի ծայրը լինի դեպի վեր, այնուհետև այն հաջորդաբար մտցրեք քթանցքների մեջ և գոլորշին շնչեք 10 րոպե շարունակ. օրվա ընթացքում կրկնեք 3-4 անգամ: 

Քանի որ սխտորի հյութը գրգռում է լորձաթաղանթը, ուստի պետք չէ կաթեցնել քթանցքի մեջ, առավել ևս` քթանցք սխտորի պճեղ մտցնել. երբեմն նման իրավիճակում հայտնվածները դրանից կարողանում են ազատվել միայն մասնագետի օգնությամբ: 

• Ինֆարկտի, ինսուլտի կանխարգելման և բուժման, զարկերակային ճնշման կարգավորման համար օգտակար է սխտորից պատրաստված թուրմը: 40 գրամ մանրացված սխտորի վրա ավելացրեք 100 գրամ օղի, 10 օր պահեք մուգ գույնի տարայի մեջ` զով տեղում: Խմեք օրը 2-3 անգամ, ուտելուց 30 րոպե առաջ, 10-ական կաթիլ: Այս թուրմը կարող եք խմել նաև միզաքարային հիվանդությունների դեպքում:
• Ստենոկարդիայի նոպայի ժամանակ ցավ զգալուն պես անհապաղ, առանց ծամելու կուլ տվեք սխտորի մի փոքրիկ կտոր: Այս պարզ միջոցը շատ դեպքերում կարող է կանխել սրտի նոպայի զարգացումը կամ թեթևացնել դրա ընթացքը:

Հիշեք, որ սխտորը պետք է չափավոր օգտագործել. այլապես այն կարող է հակառակ ազդեցությունն ունենալ: Ամեն ինչ չափի մեջ է օգտակար: 

Հարցեր, պատասխաններ, մեկնաբանություններ